Ullmhaigh d'áit

Tosaíonn fanacht cúig réalta le haird ar na mionsonraí i do spás. Má bhíonn teach fáilteach agat, d'fhéadfá do chéad léirmheasanna iontacha a fháil.

Molann Óstaigh rathúla na trí rud seo a dhéanamh chun d'áit a choinneáil chomh glan leis an bhfíoruisce:

• Dírigh ar áiteanna a bhíonn in úsáid go han-mhinic. Glan na cuntair, glan na draenacha, agus athlíon buidéil ghallúnaí. Seiceáil arís nach bhfuil aon ribe gruaige fágtha in aon áit.

• Athnuaigh gach seomra. Oscail fuinneoga, bain an deannach de dhromchlaí, agus glan na hurláir ar fad, faoin troscán chomh maith. Cóirigh na leapacha le línéadach tí úr agus cuir tuáillí glana ar fáil do gach aoi.

• Cruthaigh seicliosta don athrú idir áirithintí. Lean an gnáthamh céanna roimh gach seiceáil isteach ionas nach ndéanfar dearmad ar rud ar bith.

“Fágaim bearna sé uair an chloig idir áirithintí ionas gur féidir linn glanadh críochnúil a dhéanamh,” arsa Daniel, ball de Bhord Comhairleach na nÓstach agus Sáróstach sna hOileáin Chanáracha, an Spáinn. “Caithfidh an spás a bheith díreach mar atá sé agat i do liostú ar líne."

Bíonn coinne ag aíonna go mbeidh saoráidí riachtanacha i d'áit. Is éard atá i gceist leis sin:

• Páipéar leithris
• Gallúnach (do lámha agus don chorp)
• Tuáille amháin in aghaidh an aoi
• Piliúr amháin in aghaidh an aoi
• Éadaí leapa do gach leaba aoi

Cabhraigh le haíonna a bheith ar a suaimhneas trí earraí áisiúla a chur ar fáil i ngach seomra, mar shampla:

An chistin

• Cóirithe boird don líon uasta aíonna
• Déantóir caife, citeal tae, potaí agus pannaí, agus uirlisí cócaireachta
• Salann, piobar agus ola chócaireachta
• Leacht níocháin, raca triomaithe, agus éadach nó rolla cistine

An seomra suí

• Suíocháin don líon uasta aíonna
• Teilifíseán lena bhfuil seirbhís sruthaithe
• Lámhleabhar tí ina bhfuil treoracha maidir le conas gléasanna a úsáid

An seomra folctha

• Tuáillí láimhe agus mata folcadáin
• Scuab leithris agus suncaire
• Seampú, feabhsaitheoir agus triomadóir gruaige

An seomra leapa

• Clúdaigh fuinneog agus boird cois leapa ar a bhfuil lampaí
• Tarraiceáin nó crochadáin le haghaidh éadaí, agus spás le haghaidh bagáiste
• Blaincéad breise agus gaothrán nó téitheoir spáis

Nuair a bheidh d'áit socraithe agat, caith oíche ann nó iarr ar chairde fanacht ann agus aiseolas a thabhairt. Gheobhaidh tú amach go tapa cad atá ar iarraidh.

Is mór ag aíonna nuair a thugann Óstaigh aird ar mhionsonraí agus nuair a thairgeann siad rudaí breise chun an fanacht a dhéanamh níos compordaí. I measc na rudaí breise sin tá plugaí cluaise, pillíní cadáis, cluichí boird, cuibheoirí plugála, agus aon rud eile a bhaineann go sonrach le do shuíomh, mar shampla scáthanna fearthainne nó tuáillí trá.

Deir go leor Óstach seanbhunaithe gur maith leo:

• Bronntanas fáilte a thabhairt. Fág nóta lámhscríofa, ciseán d'fhéiríní áitiúla, nó rud éigin chun ócáid speisialta a cheiliúradh.
• Cluthaireacht a chruthú le maisiúcháin. Smaoinigh ar na rudaí a chuidíonn leatsa do scíth a ligean agus tú ag taisteal. Is féidir le healaín bhalla, plandaí agus cúisíní compord agus pearsantacht a chur san áit.
• An lámhleabhar tí a phriontáil. Cuir an lámhleabhar in áit a bhfaighidh aíonna é go héasca, amhail ar an gcuntar.
• Aird a tharraingt ar ghnéithe speisialta. Sa chur síos ar do liostú, tarraing aird ar aon rud a chuireann tú ar fáil a fhreastalaíonn ar riachtanais áirithe, amhail spás oibre tiomnaithe nó gnéithe inrochtaineachta.

“Tá 'pack 'n play', cathaoir ard, agus leabhair agus bréagáin agam,” arsa Elsie, Óstach in Nashville, Tennessee.

Más mian leat tuilleadh leideanna a fháil agus mura bhfuil do chéad áirithint faighte agat, is féidir leat treoir duine le duine a fháil ó Sháróstach. Is iadsan na hÓstaigh ar Airbnb a bhfuil rátálacha arda agus an taithí is fearr acu.

Seans gur athraigh an t-eolas atá sa mhír seo ó foilsíodh í.