Conas grianghraif iontacha a ghlacadh le haghaidh do liostaithe

Tarraingíonn grianghraif iontacha den liostú aird, socraíonn siad ionchais shoiléire agus tugann siad muinín d'aíonna áirithint a dhéanamh. Bain triail as na leideanna seo chun grianghraif ardcháilíochta de d'áit a ghlacadh.

Cuidíonn grianghraif mhionsonraithe le haíonna a chinneadh an bhfreastalaíonn do liostú ar a gcuid riachtanas. Cuir slacht ar d'áit agus pleanáil do sheisiún sula dtosóidh tú ag glacadh grianghraf.

• Glan agus bain tranglam. Taispeáin do na haíonna an méid a bheidh rompu go díreach. “Is ábhar iontais é an oiread daoine a dhéanann dearmad a gcuid earraí randamacha a ghlanadh ón spás sula dtógann siad grianghraif,” arsa Jeff, grianghrafadóir agus Sáróstach in Joshua Tree, California.
• Roghnaigh na gnéithe ar mhaith leat aird a tharraingt orthu. Cad iad na rudaí a thaitneoidh go mór le haíonna faoi d'áit? Cén t-eolas a theastaíonn uathu chun rudaí gan choinne a sheachaint? Bain úsáid as grianghraif chun sonraí uathúla, saoráidí a bhfuil tóir orthu, agus gnéithe inrochtaineachta a chur ar taispeáint.
• Déan liosta. Bíodh sé i gceist agat gach seomra agus limistéar ar féidir le haíonna é a úsáid a ghabháil ó uillinneacha éagsúla. Mar shampla, d'fhéadfadh grianghraif den chúlchlós díriú ar an gclós ar fad, ar an linn snámha, ar an bpaitió agus cathaoireacha suaimhnis gréine, agus ar an laiste ar an ngeata.
• Faigh an solas is fearr. Tugann solas bog nádúrtha ton críoúil fáilteach do ghrianghraif. Bíodh sé i gceist agat grianghraif a ghlacadh ar an taobh istigh ag an uair a fhaigheann na seomraí an chuid is mó de sholas an lae. Glac grianghraif amuigh faoin aer le linn “uaireanta órga”, an 60 nóiméad tar éis éirí na gréine agus roimh luí na gréine.
• Smaoinigh ar ghairmí a fhostú. Tá grianghrafadóireacht ghairmiúil ar fáil trí Airbnb i gcathracha ar leith ar fud an domhain.

Is féidir le formhór na gceamaraí grianghraif tharraingteacha den liostú a ghabháil, an ceann ar d'fhón cliste san áireamh. Seo an dóigh lena chinntiú go mbeidh cuma iontach ar do chuid grianghraf ar Airbnb.

• Múch an splanc. Oscail na dallóga, na scáthanna agus na cuirtíní ar na fuinneoga. Mura bhfuil go leor solas nádúrtha agat agus má tá do ghrianghraif ródhorcha fós, cuir na soilse ar siúl.
• Glac grianghraif chothrománacha. Tá grianghraif chothrománacha níos fearr ná grianghraif ingearacha toisc go ndéantar íomhánna a bhearradh ina gcearnóga sna torthaí cuardaigh, agus go dtaispeántar grianghraif i mód tírdhreacha ar leathanach do liostaithe.
• Cuir an t-ábhar i lár an fhráma. Cuir eangacha ar siúl chun cabhrú le rudaí a chur i líne.
• Glac grianghraif díreach ar aghaidh. Glac grianghraif ó shuíomh neodrach, gan an lionsa a chlaonadh suas nó síos, chun radharc réalaíoch a thabhairt d'aíonna ar d'áit.
• Roghnaigh grianghraif. Roghnaigh meascán d'íomhánna leathana, lár-raoin agus gar-amhairc chun an pictiúr mór agus na sonraí beaga a roinnt.
• Cuir grianghraif in eagar. Coigeartaigh gile, codarsnacht agus gealáin gach grianghraif, ag baint úsáid as uirlisí amhail an cnaipe uath-eagarthóireachta ar d'fhón. Déan íomhánna a bhearradh, a dhíriú nó a rothlú de láimh (ionas go mbeidh siad ina seasamh i gceart) de réir mar is gá.
• Uaslódáil grianghraif in ardtaifeach. Bain úsáid as grianghraif atá 1200 picteilín faoi 800 picteilín ar a laghad. Tá méideanna comhaid níos mó níos fearr—suas go dtí thart ar 10 meigibheart.

Tar éis duit do ghrianghraif a uaslódáil, bain úsáid as na huirlisí sa chluaisín Liostuithe chun do spás a chur ar taispeáint.

• Cruthaigh camchuairt ghrianghrafadóireachta. Déanann an chamchuairt ghrianghrafadóireachta do chuid íomhánna a shórtáil go huathoibríoch de réir an tseomra chun cabhrú le haíonna leagan amach do thí a thuiscint. Is féidir leat grianghraif a bhogadh, a bhaint agus a chur leis.
• Cuir sonraí le gach seomra. D'fhéadfá a thabhairt chun suntais go bhfuil leaba rí sa seomra leapa nó go bhfuil teilifíseán 55 orlach sa seomra suí. Is féidir leat eolas a chur san áireamh faoi ghnéithe inrochtaineachta an tseomra freisin.
• Scríobh fotheidil ghrianghraif. Mínigh an méid nach bhfuil le feiceáil sa ghrianghraf a d'fhéadfadh a bheith tábhachtach d'aíonna. Mar shampla, “Is féidir le suas le deichniúr a bheith ina suí ag an mbord itheacháin bileoige agus é sínte amach ina iomláine.”
• Soiléirigh an áit a bhfuil gach seomra sa phlean urláir. Tabhair comhthéacs amhail, “Tá Seomra Leapa 1 ar an dara hurlár agus tá seomra folctha en-suite ann.”
• Cuir béim ar ghnéithe agus ar shaoráidí. Tabhair aird ar nithe a bhfuil tóir orthu. Mar shampla, “Tá meaisín espresso, citeal leictreach agus cuisneoir, ag a bhfuil spás seilf d'aíonna, sa chistin chomhroinnte.”  Nuair a bheidh tú críochnaithe leis an eagarthóireacht, tapáil ar an gcnaipe "Amharc" chun réamhamharc a fháil ar do liostú.

 Nuair a bheidh tú críochnaithe leis an eagarthóireacht, tapáil ar an gcnaipe Amharc chun réamhamharc a fháil ar do liostú.

Seans gur athraigh an t-eolas atá sa mhír seo ó foilsíodh í.